Fejn tidħol il-kitba bil-Malti, il-poeżija kienet l-ewwel imħabba ta’ Charles Flores. Biha, fiha u madwarha daħal b’suċċess f’għejjun kreattivi oħra tal-letteratura kif ukoll fil-mogħdijiet imserrpa tal-qasam ġurnalistiku.
“Dan hu verament ktieb ta’ min jixtarru. Fih materjal għal kull staġun, u minn awtur matur li jaf kif iħaddem il-forġa tal-kliem. Charles Flores għadda minn esperjenzi varji, li mingħajrhom l-ebda awtur ma jista’ jinnaviga fil-baħar imqalleb tal-poeżija. Jaf ukoll jiżen il-kelma ġusta u jolqot fil-laħam il-ħaj tal-argument. Jaqta’ bla kantunieri u jeżalta fejn hemm bżonn.”
“Żgur li l-arti kaligrafika ta’ Gordon Pace Flores, kultant fil-forma ta’ graffiti, drabi oħra fi żwieġ perfett mal-kontenut, mhux biss iżżejjen imma wkoll tikkumplimenta l-kitbiet ta’ Flores bil-forom u l-kuluri varji tagħhom.”
