Rosalie, tfajla ta’ sittax-il sena, kienet qed tipprova tiddeċiedi jekk tibdiex kors l-Università, inkella tkomplix tavvanza fl-istudju tal-vjolin fejn kienet ġa mxiet sew u ħadet sehem f’kunċerti. L-għalliem tagħha insista li hi kellha ddoqq dwett, Meditation, mill-opra Thaïs, ma’ Frank, Malti Awstraljan li kien jinsab Malta għal ftit jiem għall-okkażjoni ta’ kunċert kbir li kellu jsir f’sala kbira, il-Furjana. Baxxiet rasha, u bdew il-provi bejn Rosalie u Frank. Malajr bejniethom nibtet l-imħabba, iżda Frank kien wasallu ż-żmien li jitlaq lejn l-Awstralja. Rosalie twiegħed lil Frank li malli jkollha tmintax-il sena tmur ħdejh, waqt li hu jwegħidha mħabbtu u li jiktbilha kull ġimgħa. Wara ftit tal-jiem l-ittri waqfu ħesrem. X’kien ġara?