Monica u Sylvia kienu tewmin ta’ sittax-il sena, tfajliet serji li jinħabbu sew bejniethom. Qed jistudjaw għax waslu l-eżamijiet tal-Livell Ordinarju. B’danakollu, filgħaxija ommhon kienet tħallihom jieqfu mill-istudju biex imorru dawra ta’ siegħa fi Ġnien Howard, ir-Rabat, sewwasew quddiem darhom. It-tfajliet dritt kienu jerħulha lejn iċ-ċint li jagħti għall-foss ta’ taħt is-swar, għax dejjem kien ikun hemm klikka ġuvintur jilagħbu l-ballun. Darba, Monica b’ċajta staqsiet ’l oħtha liema minn dawk il-ġuvnotti kien il-favorit tagħha, b’wegħda li hi wkoll tiżvela min kien dak li l-aktar jogħġobha. Sylvia mill-ewwel tiddikjara li tiffansja lil Pawlu. Monica mmutat għax inzerta kien il-favorit tagħha wkoll. B’danakollu, biex ma tweġġax lil oħtha, tivvinta li l-aktar li jolqotha kien ieħor. Wara l-eżamijiet, Sylvia bdiet tinnamra ma’ Pawlu filwaqt li Monica, qalbha maqsuma, tilfet it-tama u ddeċidiet li tidħol soru. Għamlet l-ewwel voti. Tgħid dawn il-voti u l-ħitan għoljin tal-kunvent kienu biżżejjed biex iberrdulha mħabbitha lejn Pawlu?