X’weġgħat jitilgħu mid-dlam tal-kantini ta’ ruħ
il-bniedem?

Mill-ispralli tal-għeluq jaf jixref ukoll id-dawl ta’ emozzjonijiet sbieħ u ta’ valuri nobbli…

… Uħud min-novelli jeħduna fi vjaġġ f’waqtiet ta’ insigurtà li ġabet il-Covid-19. Tiġrib li neżża’ bnedmin mil-libsa umana tagħhom. Qajmilhom il-karba
tal-imgħoddi. Lil oħrajn ressaqhom lejn għaqda intima.

Xi rakkonti jperrċu x-xenqa għal imħabba mitlufa. Ma’ karattru nistħarrġu l-kunflitt bejn żewġ ġibdiet. F’moħħ poetiku tgħaxxaqna s-sensittività lejn is-seħer tal-ambjent naturali. Niltaqgħu ma’ bniedem li joffri kwadretti ta’ kultura li għabet. F’ieħor, is-suspetti u l-preġudizzju jħarbtulu s-sliem u jwasslu għal soluzzjoni traġika. Nimxu fid-dell tal-mara li ġġorr il-weġgħa ta’ ilsna li jċarrtu u ta’ mħuħ li ma jagħrfux jintebħu. Żagħżugħa oħra mifxula f’estremitajiet psikoloġiċi ġġarrab vjolenza domestika. Insegwu anki r-rieda ta’ mara li ma tibżax terfa’ rasha bi kburija.

F’dawn l-istejjer nimirħu f’ambjenti lokali. Ma’ nies tad-demm u l-laħam.