Is-serje Frekwenzi hija msejsa fuq il-ġabra ta’ novelli bl-istess isem, ippubblikata f’Novembru 2012. Din is-serje tindirizza stejjer ta’ sesswalità u ta’ mħabba li nħbew taħt it-tapit minħabba l-fatt li s-soċjetà ġieli tiddarras tisma’ u tara ċerti realtajiet. Għalhekk din is-serje hi indirzzata lil kull min hu miftuħ li jisma’ dawn l-istejjer, bit-twemmin li l-poplu Malti mmatura u hu iktar miftuħ minn qatt qabel għal possibiltajiet alternattvi. L-iskop hu li titqanqal kuxjenza, speċjalment fejn jidħlu temi relatati ma’ aspetti ta’ minoranzi fis-soċjetà Maltija, bħal pereżemplju, il-komunità gay jew dawk kollha li jbatu minn xi forma ta’ emarġinazzjoni. Ġeneralment dawn huma  frekwenzi ħiemda jew imsikkta, u ġeneralment imċaħħda mill-espożizzjoni li tixirqilhom. L-għajta tal-imħabba mċaħħda, mixtieqa u abbużata, tiddomina fit-tnax-il episodju li jippreżentaw karattri u qagħdiet li llum donnhom saru l-ħajja ta’ kuljum. F’kull karattru hemm weġgħa, hemm karba, hemm kelma li trid tingħad u tinstema’, hemm l-umanità oppressa quddiem soċjetà tant progressiva li għadha ma fehmitx li l-progress imur lil hinn mill-gidba teknoloġika, imma li l-progress huwa l-aċċettazzjoni tal-umanità fis-sens ħolistiku, din l-umanità li ġġarrab, u għax iġġarrab trid widen.