Ninsabu Malta ftit qabel ma bdiet is-sena 1900. F’razzett ġo Wied Babu jgħixu flimkien żewġt aħwa nisa; Susann miżżewġa lil Dwardu li jkollhom tarbija, Bettina; u Mattea li żżewġet qabilha lil Peppin li ma jkollhomx tfal. Id-destin ried li fl-istess inħawi jitwieled Luciano f’ċirkustanzi strambi li jispiċċa f’dirgħajn Mattea biex trabbieh. Minn kien sewwa sew dan it-tifel?

Malli jibda jitfarfar isir jaf dwar ommu, imma qatt dwar missieru. Jikber ftit ieħor u tfaqqa’ l-Ewwel Gwerra Dinjija li jkollha effett kbir fuq dawn iż-żewġ familji. Aktar minn hekk, ftit wara jibda l-flaġell tal-Influwenza Spanjola, b’mijiet ta’ Maltin jisfaw vittmi.

Luciano u Bettina li kienu jaħsbu li huma kuġini miġbudin sew lejn xulxin. Bettina tilħaq tabiba bir-riskju li tittieħed bil-marda hi wkoll. X’ser jiġri minn dil-koppja ta’ maħbubin? Tgħid Luciano jsir jaf xi darba min kien missieru?