“X’idea straordinarja, tabilħaqq, ġietni dik il-lejla, li nagħżel bħala reġina lil Mademoiselle Perle!… Allura għall-ewwel darba f’ħajti, jiena ħarist lejha, u staqsejt lili nnifsi x’ħobż tiekol. Kont imdorri naraha f’dik id-dar, bħalma wieħed jara l-pultruni qodma miksija bit-tapizzerija li fuqhom ikun ilu joqgħod bilqiegħda minn tfulitu mingħajr qatt ma jkun ta kashom.

Jum fost l-oħrajn, mingħajr ma jkun jaf il-għala, għax raġġ tax-xemx jaqa’ fuq il-maqgħad, hu jgħid ħabta u sabta lilu nnifsu: ‘Kos, dil-biċċa għamara tgħidx kemm hi interessanti!’ U jiskopri li l-injam inħadem minn artist, u li d-drapp xi ħaġa speċjali. Jien qatt ma kont tajt kas tagħha lil Mlle Perle.”

“Toni Aquilina juri fit-traduzzjoni dixxiplina lingwistika kbira, u għalih dan ma kienx ċertament xogħol ta’ kapriċċ iżda wieħed ta’ preċiżjoni.” Il-President Emeritus, Ugo Mifsud Bonnici