Għal ħafna snin, il-kitba ta’ Ġuljana ta’ Norwich baqgħet mistura. Ftit li xejn kienet magħrufa. Imma f’dawn l-aħħar snin kiber sew l-interess fiha u ħafna qegħdin jaqrawha, jistudjawha u jispiraw ruħhom minnha.

Hi kellha esperjenza straordinarja tal-imħabba ta’ Kristu u xtaqet taqsam ma’ ħutha l-insara dak li għaddiet minnu, biex huma wkoll jagħrfu din l-imħabba meraviljuża. Anke fil-ġurnata tal-lum, min jaqraha jista’ jagħraf il-kobor ta’ din l-imħabba u ta’ kemm il-bniedem hu prezzjuż għal Alla.

Fi kliem l-istudjuż Benedittin Jean Leclercq, hi tgħaqqad flimkien b’faċilità kbira dak li hu l-ġisem ma’ dak li hu tal-ispirtu, l-ordinarju mal-istraordinarju, l-affettività mal-intelliġenza, it-tagħlim mal-ispiritwalità, is-sbuħija mal-verità, l-immaġinazzjoni mar-raġuni, u fuq kollox, l-uman mad-divin.