Kienet is-sena 1940. Id-dinja kienet qed tiffaċċa waħda mill-agħar gwerer li qatt rat l-istorja. Fi dwejra ċkejkna, Marija ltaqgħet mal-imħabba ta’ ħajjitha u minnha nibtet storja li baqgħet sejra għal aktar minn ħamsin sena.

Ħajja pjuttost ordinarja u normali imma bbażata kollha kemm hi fuq il-verità, tikber u tisbieħ bl-istess weġgħat li għaddew minnhom il-protagonisti li magħhom se tiltaqa’ … jekk tippermettili nżommlok idek u mmexxik fit-triq li mxejt minnha jien tul il-mogħdija taż-żmien.

Għaddew is-snin, u Marija reġgħet daret lura lejn il-passat. Xtaqet issewwi l-iżball li kienet imġiegħla tagħmel seba’ snin qabel. B’kuraġġ u determinazzjoni marret lura fejn kien beda kollox. Imma ċerti affarijiet mhux dejjem jinbidlu kif nixtiquhom aħna. Il-ħajja għandha ħabta tibqa’ għaddejja għal riħha waqt li aħna nkunu qed nagħmlu pjanijiet oħra. Imxi miegħi, ħa nkomplu l-istorja flimkien…