L-imħabba tal-ħares ma tmut qatt!

Lil Rożina kont inħobbha. Ħabbejtha b’qalbi kollha meta kont żagħżugħ, meta kont għadni b’saħħti. Proprjament, meta kont għadni ħaj!  U issa li d-destin firidna minn xulxin, xorta waħda għadni ma nistax nitlaqha. Ma nistax ninfired minnha. Għadni rrid nibqa’ magħha. Irrid li nibqa’ ngawdiha għax fl-‘ispirtu’ jien xorta waħda għadni nħobbha.

Ma rridhiex tħobb lil ħaddieħor. Li tkun ta’ ħaddieħor. Irrid li Rożina tibqa’ tiegħi – anzi tiegħi biss! Hi taf li jiena nkun ħdejha. Tħossni maġenbha. Tħoss is-sħana tan-nifs tiegħi. Il-wens tat-tgħanniqa mqanqla tiegħi… la jien issa sirt il-ħares sigriet tagħha.

Il-ħares li se nibqa’ nħobbha, nipprovdilha, inħarisha, u anki nfissidha.

Għax l-imħabba tal-ħares… ma tmut qatt!

Imma tgħid, tfajla sabiħa bħal Rożina tiegħi lesta li tqatta’ l-kumplament ta’ ħajjitha waħedha? Imxennqa għall-imħabba? Imxennqa għal xi żagħżugħ ieħor… tad-demm u l-laħam bħalha?…