Ġabra ta’ Diskorsi dwar il-Fidi u l-Ħajja Nisranija fil-Knisja u fis-Soċjetà (1998-2019)

Huwa ta’ pjaċir kbir għalija li nintroduċi t-tieni volum tal-kitbiet ta’ Mons. Hector Scerri li, bħal San John Henry Newman, iqis li l-kitba tiegħu toħroġ mill-qalb u tipprova tilħaq il-qalb ta’ min qed jaqra jew jisma’ … cor ad cor loquitur. F’dan il-volum, wieħed isib diversi kitbiet ta’ approfondiment teoloġiku mill-aqwa u aħna nixtiequ nuru l-gratitudni tagħna lejn saċerdot Malti li ħaddem l-intellett u l-qalb tiegħu biex jesprimi raġġ sabiħ u arrikkenti tal-għerf tat-tradizzjoni tal-Knisja. Nixtieq insellem id-diversi ħidmiet li Mons. Scerri jħaddan fid-Djoċesi u fl-Università ta’ Malta għaliex dawn jidhru ċari fil-kitbiet tiegħu. L-impenn għal teoloġija sana, l-imħabba tiegħu lejn il-Maġisteru tal-Papiet, il-ħeġġa tiegħu għall-Ekumeniżmu, għall-istudju tal-Missirijiet tal-Knisja, jew tal-Patroloġija, kif ukoll imħabba speċjali għas-saċerdozju. Nawgura li l-qari ta’ dan il-volum, teżor prezzjuż ta’ tradizzjoni teoloġika Maltija, ikun ta’ siwi għal kull min jaqrah u għall-ikbar glorja lil Alla.

L-Arċisqof Charles J. Scicluna, Mid-Daħla tal-Ktieb

Hector Scerri, imwieled fl-1965 u ordnat saċerdot fl-1993, ilu jgħallem it-Teoloġija Dommatika fl-Università ta’ Malta mill-1998. Huwa l-President tal-Kummissjoni Dottrinali tal-Konferenza Episkopali Maltija u President tal-Kummissjoni Ekumenika tal-Arċidjoċesi ta’ Malta. Fl-2014, il-Papa Franġisku ħatru konsultur fil-Kunsill Pontifiċju għall-Promozzjoni tal-Għaqda fost l-Insara. Huwa wkoll il-Fundatur-President tas-Soċjetà Patristika Maltija, u l-awtur jew l-editur ta’ erbatax-il ktieb. Ikkontribwixxa artikli akkademiċi f’bosta rivisti Maltin u barranin, kif ukoll f’rivisti lokali ta’ xejra aktar popolari. Is-suġġetti li jikteb dwarhom jinkludu s-Sagramenti, il-Patristika, l-Ekumeniżmu u r-rabta bejn il-fidi, l-ispiritwalità u l-ħajja ta’ kuljum.