Fil-karriera twila tiegħu, Karmenu Aquilina dderieġa bosta drammi li ntlaqgħu tajjeb kemm mill-pubbliku kif ukoll mill-kritiċi, u żgur ma għandux bżonn ta’ introduzzjoni fost dawk li huma midħla tal-palk Malti. Imma x-xogħlijiet teatrali oriġinali tiegħu għal ħafna snin baqgħu jistennew biex forsi xi darba jaraw id-dawl. Sa fl-aħħar hawnhekk qiegħed jippreżenta din it-triloġija ta’ drammi li, mil-lat tematiku-ideoloġiku, kif ukoll mil-lat stilistiku-tekniku, jistħoqqilhom skrutinju serju għax jixhdu moħħ għarriexi u pertinenti.
Ma setax ikun li l-esperjenza vasta tiegħu fit-teatru ma tixprunax l-immaġinazzjoni fertili tiegħu lejn orizzonti ġodda. Jgħaddi mis-serenità tal-esperjenza umana għat-tempesti qliel tat-tbatija. Jorbot ir-ruħ tal-individwu mal-flaġelli li s-soċjetà tgħaddih minnhom. Ma jinħeliex itiegħem ir-romantiku, imma l-boxxla tal-għarfien tgħaddih minn kull morr sa ma jwassal lill-udjenza tagħraf qagħdietha.
Tnejn mid-drammi ġew ippremjati Malta u l-ieħor barra.
