F’maltempata mill‑iktar qalila fi Frar tal‑1968, ajruplan tat‑tip Super Constellation jagħmel inżul ta’ emerġenza fl‑Ajruport ta’ Malta. Ġiġi, l‑ewwel aġent sigriet Malti, ikun qed jaqdi dmiru fil‑Marsa Sports Club meta jsir jaf li l‑ajruplan niżel b’reġistrazzjoni falza.
Sadanittant Frida, li taħdem ġewwa Strada Stretta, tiltaqa’ ma’ Ġiġi. Hawnhekk jiskopru li t‑tnejn li huma jiffurmaw parti mill‑istess ċirku tas‑Servizz Sigriet. Pass pass, huma jispiċċaw maqbuda f’xibka ta’ intriċċi internazzjonali bejn is‑CIA, il‑Mossad u grupp ta’ terroristi.
Ir‑relazzjoni li tibda tinbet bejn Ġiġi u Frida tkompli tikkumplika s‑sitwazzjoni, hekk kif it‑tnejn, f’tiġrija mal‑ħin, iridu jżommu milli jitwettaq l‑attakk li jkun se jsir, b’sogru għal ħajjithom.